فواصل ثابته
قصّيت شَعـَرك فنزّل دم
الطول ع العرض هدمه
فياريت تراجع نفسك
تتفاهم مع اعضائك
فتفـوّت على ناس الفرصه اللى استنوها
مثلاً
شَعرك فى الصوره بتاعة الثانوى زى ماهُوّ
رُده بسنان المشط اللى اتبردِت من حمو الراس
ولعلمك
فيه زرْع سنان
وخرز للضهر
وسرير بيزّيق ساعة النوم
******************************
لوحة القلق اللى انت راسمها ف تالته اعدادى
وطالع بيها القلعه
رغم انك لامم فيها الصغيّر والكبير واللى راكبين الحمير
مقدرتش مره تخش عليها الجنه
والألوان بتاعتها خرطت
بس اطمن
واضح إنك كنت بترسم وانت فى ضلمه
وان ساعتها الدم كان اسود
******************************
فوق تعريشة البط
بتكوّم حبة احلام ومنافع
على سلم مايطمنش بتنزل درجه بدرجه عليهم
حاول تنزل بشوييييييش
لو عايز تطلع
اسحــــب حلـــــــم
ايه رأيك
ـــــــــــــــــــــــــــــــــــــــــــــــــــــــــ
